ಶಿರಾ ಉಪಚುನಾವಣೆ

 ಸತ್ಯಣ್ಣನ ಅಕಾಲಿಕ ಮರಣ

ತಂದಿದೆ ಶಿರಾ ಕ್ಷೇತ್ರದ ಉಪಚುನಾವಣಾ

ಪ್ರಚಾರ ಬಲು ಜೋರು 

ಏರಿಸುತಿದೆ ಕಾವು

ನಮ್ಮ ಮತ ನಮ್ಮ ಹಕ್ಕು 

ಚಲಾಯಿಸದಿದ್ದರದುವೆ ದೊಡ್ಡ ತಪ್ಪು 

ನಮ್ಮದೊಂದು ಮತ

ಆಗಲಿದೆ ಅಭಿವೃದ್ಧಿಯ ಮೂಲ

ಸೀರೆ ಹೆಂಡ ಬದಿಗೆ ಸರಿಸಿ

ಒತ್ತೋಣ ಓಟು

ಮುಟ್ಟದೆಯೇ 

ಗಾಂಧಿ ನೋಟು

ಸ್ವಇಚ್ಚೆಯಿಂದ ಮತದಾನ ಮಾಡಿ

ಎಲ್ಲರಿಂದ ಮತದಾನ ಮಾಡಿಸಿ

ಮಳೆಗೆ ಕೆರೆಕುಂಟೆ ತುಂಬಿದಂತೆ

ಓಟಿನಿಂದ ಮತಡಬ್ಬಿ ತುಂಬಿಸಿ 

ಸಮರ್ಥರನ್ನು ಆರಿಸೋಣ

                                ಇಂತಿ ,

                                ಕವಿತಾ ಗೋಪಿಕುಂಟೆ

11/12/2020 ರ ತುಮಕೂರು ವಾರ್ತೆ ಪತ್ರಿಕೆಯಲ್ಲಿ ನನ್ನ ಕವನ "ಕರೋನ"

 

ಹುಟ್ಟು ಹಬ್ಬದ ಶುಭಾಶಯಗಳು ಮಗಳೇ "ಇಶಾ"

 

16/8/2020 ರ ಪ್ರಜಾಪ್ರಗತಿ ದಿನಪತ್ರಿಕೆಯಲ್ಲಿ ನನ್ನ ಕವನ "ಸಯಾಮಿ"

 

8/3/2020 ರ ಪ್ರಜಾಪ್ರಗತಿ ದಿನಪತ್ರಿಕೆಯಲ್ಲಿ ನನ್ನ ಕವನ "ಪ್ರಣತಿ"

ಅಕ್ಟೋಬರ್ 2019 - ಮಾರ್ಚ್ 2020 ಸಾಹಿತ್ಯ ಸಿಂಚನ ತ್ರೈಮಾಸಿಕ ಪತ್ರಿಕೆಯಲ್ಲಿ ನನ್ನ ಕವನಗಳು.

ಡಿಸೆಂಬರ್ 2018ರ ಸಾಹಿತ್ಯ ಸಿಂಚನ ತ್ರೈಮಾಸಿಕ ಪತ್ರಿಕೆಯಲ್ಲಿ ನನ್ನ ಕವನ.

20/1/2019ರ ಪ್ರಜಾಪ್ರಗತಿ ದಿನಪತ್ರಿಕೆಯಲ್ಲಿ ನನ್ನ ಕವನ "ಬದುಕೇ ಹೀಗೆ"

30/12/2018 ರ ಪ್ರಜಾಪ್ರಗತಿ ದಿನಪತ್ರಿಕೆಯಲ್ಲಿ ನನ್ನ ಕವನ "ಮಗು ಮನಸು"

16/12/2018 ರ ಪ್ರಜಾಪ್ರಗತಿ ದಿನಪತ್ರಿಕೆಯಲ್ಲಿ ನನ್ನ ಕವನ "ಖಿನ್ನತೆ"

ಅನಿಶ್ಚಿತತೆ

ಬದುಕೊಂದು ಅನಿಶ್ಚಿತತೆಯ ಗೂಡು
ಮಗ್ಗಲಾಗುವುದರೊಳಗಾಗಿ ಹಾರುವುದು
ಬದಲಾವಣೆಯ ಗುಬ್ಬಿ

-ಕವಿತಾ ಗೋಪಿಕುಂಟೆ

ಜುಲೈ - ಡಿಸೆಂಬರ್ 2017ರ ಸಾಹಿತ್ಯ ಸಿಂಚನ ತ್ರೈಮಾಸಿಕ ಪತ್ರಿಕೆಯಲ್ಲಿ ನನ್ನ ಕವನಗಳು

ಬೆಳಕು

ನನ್ನೊಳಗಿನ ನೀನು
ಕತ್ತಲೊಳಗಿನ ಬೆಳಕು

                  --ಕವಿತಾ ಗೋಪಿಕುಂಟೆ

ಸದ್ದು

ನೀರಿಗೆ ಜಿಗಿವಾಗ ಬರುವ ಶಬ್ದ
ನೀರಿಂದ ಮೇಲೇಳುವಾಗ ಬರುವುದಿಲ್ಲ
ತಪ್ಪು ಮಾಡುವಾಗ ಆಡಿಕೊಂಡು ಸದ್ದು ಮಾಡುವ ಜನ
ಒಂದೊಳ್ಳೆ ಕೆಲಸ ಮಾಡುವಾಗ ಮಾತಾಡೋದಿಲ್ಲ
ಇದರಿಂದಲೇ ತಿಳಿಯುತ್ತದೆ
ಸದ್ದಿನಿಂದಿರುವ ಉದ್ದೇಶವೇನೆಂದು

                                      --ಕವಿತಾ ಗೋಪಿಕುಂಟೆ

ಓ ಜೀವವೇ

ಓ ಜೀವವೇ
ಖುಷಿಯೆಂದರೆ ನನಗೆ,

ನನ್ನದಲ್ಲದ ಊರಿನಲಿ
ಜನತುಂಬಿದ ಬೀದಿಯಲಿ
ನಮ್ಮದೇ ಭಾಷೆಯಲಿ
ನಿನ್ನನ್ನು ಕೂಗುವುದು

ತುಂತುರು ಮಳೆಯಲಿ
ಬಿಳಿಮರಳ ಬೀಚಿನಲಿ
ನಿನ್ನೆಜ್ಜೆ ಮೇಲೆ
ನನ್ನೆಜ್ಜೆ ಇಡುವುದು

ಬಿದಿರ ಕಾಡಿನಲಿ
ಬೀಸೋ ಗಾಳಿಯಲಿ
ನಿನ್ನನ್ನೆ ಬೆನ್ನಟ್ಟಿ
ಓಡೋಡಿ ಬರುವುದು

ಅವರ ದೇವಾಲಯದಲ್ಲಿ
ಅಲ್ಲಿನ ಸಂಪ್ರದಾಯದಲಿ
ಅವರದೇ ಭಾಷೆಯಲಿ
ನಿನಗಾಗಿ ಬೇಡುವುದು

ಇಷ್ಟೆಲ್ಲಾ ಗಳಿಗೆಗಳ
ಬಚ್ಚಿಟ್ಟು ಕಾಯುತಿರುವೆ
ಬಂದುಬಿಡು ಬಹುಬೇಗ
ನಾನಿರುವ ಊರಿಗೆ

                     --ಕವಿತಾ ಗೋಪಿಕುಂಟೆ

ದಾರ

ಸೂಜಿ ನಾವಾಗಿ

ದಾರ ಬಾಳದಾರಿಯಾದಾಗ

ದಾರಕಾಕುವ ಗಂಟೇ ತವರು

ದಾರದ ಬುಡದಿ ಗಂಟಿಲದಿರೆ

ಹೊಲಿಗೆ ಸಾಧ್ಯವಿಲ್ಲ

ತವರ ಮರೆತ

ಯಾರ ಬಾಳಿಗೂ ಅರ್ಥವಿಲ್ಲ

            --ಕವಿತಾ ಗೋಪಿಕುಂಟೆ

2/7/2017 ರ ಪ್ರಜಾ ಪ್ರಗತಿ ದಿನಪತ್ರಿಕೆಯಲ್ಲಿ ನನ್ನಕವನ "ತುತ್ತು ಅನ್ನಕ್ಕಾಗಿ"

ಸಾವ ಕೆಸರು

ನಿನ್ನ ನೆರಳಿಡಿದು
ಹಿಂಬಾಲಿಸಿರುವೆ
ಮಾತಾಡದ
ಕಾಲ್ಗೆಜ್ಜೆ ಜೊತೆ
ಮಾತಾಡುವ ಪರಿಗೆ
ಹೊಳಪಿಲ್ಲದ
ಮೂಗುತಿ ಬೆಳಕಲ್ಲಿ
ದಾರಿ ಹುಡುಕುವ ದಾಟಿಗೆ
ಮನಸಾರೆ ಮನಸೋತು
ಸಾವ ಕೆಸರಲೂ
ಕನಸ ಕಮಲವ ಬಿತ್ತಿ
ಪ್ರೀತಿ ಮೊಗೆಯಲು
ಹಿಂಬಾಲಿಸಿರುವೆ

                       --ಕವಿತಾ ಗೋಪಿಕುಂಟೆ 

ಭಾವಬಣ್ಣ

ಕಳ್ಳ ನೋಟದ
ಬಾಣನಾಟಿ
ಕೆನ್ನೆಗುಳಿಯಲಿ
ಮೊಡವೆ ಮೂಡಿ
ನಿನ್ನ ಭಾವಬಣ್ಣ
ನನ್ನ ಮೊಗದ
ರಂಗೇರಿಸಿದೆ

                  --ಕವಿತಾ ಗೋಪಿಕುಂಟೆ 

ತುಂತುರು

ಇನಿಯ ಜೊತೆಗಿರಲು
ತುಂತುರು ಮಳೆಬರಲು
ಇನ್ನೇನು ಬೇಕು
ಮನ ತಣಿಯಲು

                     --ಕವಿತಾ ಗೋಪಿಕುಂಟೆ