Thursday, March 30, 2017

ಬರದ ಸಂಭ್ರಮ

ಸುಡುಬಿಸಿಲಿಗೆ
ಒಣಗಿದೊಲ
ಯುಗಾದಿ ಸಂಭ್ರಮದ
ಜೊತೆ ಮಾತಾಡುತ್ತಿತ್ತು

ಹರೆ ಹೊಟ್ಟೆಗೆ
ತಿಂದ ಕರು
ಅಪ್ಪ ಕಟ್ಟುತ್ತಿದ್ದ
ತೋರಣವ ನೋಡುತ್ತಿತ್ತು

ಕರುಕಂಡ ಹಸು
ಹಾಕಿದ ಗುಟುರು
ಉಯ್ಯಾಲೆಯಲ್ಲಿದ್ದ
ನನ್ನ ಸೆಳೆದಿತ್ತು

ಹಜಾರದಿ ಕೂತಿದ್ದ
ಅಜ್ಜನ ಬಿಸಿಯುಸಿರು
ಹಣೆಮೇಲಿನ ಶೆಖೆನೀರ
ಹಿಂಗಿಸಿಯೆಬಿಟ್ಟಿತ್ತು

                      --ಕವಿತಾ ಗೋಪಿಕುಂಟೆ

Monday, March 27, 2017

ಹನುಮನುಸಿರು

ಯಾರೋ ಕೊಟ್ಟ ದೇಹಕೆ
ನೀ ಕೊಟ್ಟೆ ಜೀವದ ಉಸಿರು
ನಾ ನಡೆವ ದಾರಿಗೆ
ನೀ ತೊಟ್ಟೆ ಗೆಲುವ ಹಸಿರು
ಯಾವುದೂ ನನ್ನದಲ್ಲ
ನನಗೇನೂ ಬೇಕಿಲ್ಲ
ನೀ ಕೊಟ್ಟ ಈ ಉಸಿರ
ನೀನೇ ತೆಗೆದುಕೋ
ಪವನಸುತನಲ್ಲಿ
ಪಾವನಿಯಾಗುವ
ಭಾಗ್ಯವನ್ನಷ್ಟೇ ಕರುಣಿಸು

--ಕವಿತಾ ಗೋಪಿಕುಂಟೆ 

Tuesday, March 21, 2017

ಗರಿಕೆ

ಕಾಲಲ್ಲಿ ವಸಕಿ
ಕೈಯಲ್ಲಿ ಕಿತ್ತು
ಬುಡ ಅಗೆದು
ಸುಟ್ಟರೂ
ಮತ್ತುಟ್ಟಿ ಬರುವ
ಗರಿಕೆಯಾಗಬೇಕು
ಛಲ ಬಿಡದೆ
ಅಂಟಿ ತನ್ನತನವ
ನಿರೂಪಿಸಲುಬೇಕು

                 --ಕವಿತಾ ಗೋಪಿಕುಂಟೆ 

ಬದಲಾವಣೆ

ಬದಲಾವಣೆಗೆಂದು ಎಲ್ಲಿಹೋದರೂ
ಅದುವೇ ಕುಟ್ಟುವ ಕೆಲಸ
ಸುತ್ತಾ ಇರುವ ಮುಖಗಳಷ್ಟೇ ಬೇರೆ
ತೋರುವ ಗುಣಗಳು ಒಂದೇ

                              --ಕವಿತಾ ಗೋಪಿಕುಂಟೆ